Denne: parkearen in de berg vöar het sportpark

As ik met mien vrouw noar de schouwburg goa in Deamter, ridt zie de auto altied earst töt an de vöardöare van de schouwburg en giet van doaruut op zuuk noar een parkearplekke. Dan betaal ie de hoofdpries en het zuken noar ‘zo dicht meugelijk bie’ kost net zo völle tied as een eindie wiederop parkearen en een stukkie lopen.

Dan heb ik het nog niet iens oaver het genot van det stukkie lopen. Vöar anvang de benen nog eam strekken., Noa ofloop de vöarstelling loaten bezinken.

In Deamter en Zwolle weet ik de plekken inmiddels van woar ie gratis de auto an de weg kunt zetten op vief minuten lopen van het centrum. Lest noar Orpheus in Apeldoorn heb ik mie det gewoon vöar die tied eam opezöcht op Google Maps. Mar det werd nog een ingewikkelde parkearsessie want mien vrouw wol nog iets dichter bie, doar lukken het niet en de weg terugge kon niet wegens eenrichtingsverkeer. Wie waren nog net op tied vöar een overigens fantastisch optreden van Bertus Borgers.

Ik mos doar an denken toen ik vöarbie zag komm det Roalter parkearwachters (BOA nuumt ze die, want ambtenaren probeart makkelijke taal te gebruken) streng goat bekeuren as ie niet in een parkearvak stoat, mar bevobbeld gewoon op een stuk gruun plantsoen.

Bie Rohda is det grune plantsoen druk bezet as al die sportende meansen in het weekend töt zo dicht mogelijk bie de entree van het sportpark probeart te parkearen, kennelijk öm energie te spoaren vöar de wedstrijd. Overigens stiet het zoaterdag ’s monn’s ok stampvol terwijl d’r dan toch gin voetballers actief bent die al een riebewies hebt…

D’r is een eind wiederop parkearplaatse genog. Bie het Carmelcollege stiet het bevobbeld löag. Mar in Roalte mag ie det niet tee’ng mekarer zeng. ‘Zöar toch niet zo’ en ‘doar heb ie toch gin last van?’ is dan de reactie. Dus heul ik mie d’r mar stille oaver.

Tut ik dus las det de gemeente grösparkearders giet beköaren. Ik denk, dan zeg ik met een ömweg wat ik d’r vindf döar Rohda te tippen det ze die foutparkearders better mar kunt waarschuwen. Krieg ik as antwoard det Roalte better kan wachen met beköaren töt de neeje parkearplaatse kloar is. Det giet vöarbie an het gegeven det d’r noe al parpearplekke genog is, mar niet töt an de vöardöare.

Mar det mag ie in Roalte niet ze’ng. En ie mag ok niet ze’ng det ie ok met de fietse noar het sportveld kunt.

Het bericht Denne: parkearen in de berg vöar het sportpark verscheen eerst op Opinie in Salland.

…
Het hele artikel is te lezen op www.Salland1.nl